Рассмотрев в заседании 6 Апреля представленное существующею при Отделе Комиссиею прилагаемое при сем «последование литии, певаемое в нужди, скорби и обстояния», Отдел постановил: Согласно заключению Комиссии признать желательным в виду обстоятельств настоящего времени восстановление не употребляющегося ныне последования литии, содержащегося в Большом Требнике, с внесенными в оный чин дополнениями, выработанными Комиссиею. Означенный чин Отдел имеет честь представить чрез Соборный Совет на благоусмотрение и надлежащее распоряжение Священного Синода с заключением Отдела о желательности совершения означенного чина по воскресным дням после вечерни и во время крестных ходов, прошения же на великой и сугубой ектениях помещенные в означенном чине, должны быть возносимы на всех службах.
Замещающий Председателя Епископ Пахомий.
Делопроизводитель Николай Кедров.
С подлинным верно: Делопроизводитель
Последование литии,
певаемое в нужди, скорби и обстояния.
По еже благословити, начинаем: Трисвятое, Пресвятая Троице, Отче наш: Яко Твое есть Царство, Господи помилуй 12. Приидите поклонимся и псалом 142: Господи услыши молитву мою: И в конец поется: Дух Твой благий наставит мя на землю праву.
Таже великую ектению.
Миром Господу помолимся.
О свышнем мире:
О мире всего мира:
О святем храме сем:
О великем Господине:
О страждущей державе Российстей и о спасении ея Господу помолимся.
О пособити и покорити под нозе ея:
О граде сем:
О благорастворении воздухов:
О плавающих:
О братиях наших, на судищах, в темницах, узах, заточении, изгнании и горьких работах сущих, Господу помолимся.
О всякой души христианстей скорбящей, озлобленней, милости и помощи Божией требующей, Господу помолимся.
О братиях наших, жизнь свою положивших за Православную Церковь, Господу помолимся.
О избавитися:
Заступи, спаси:
Пресвятую, Пречистую:
Яко подобает.
Таже Бог Господь, во глас 6, и тропари. Помилуй нас Господи. Слава: Господи помилуй нас. И ныне
Милосердия двери.
Таже начинаем стихословити псалмы со сладкопением во глас 6, поющее тропарь глас 6. Благоутробне, долготерпеливе и всещедрый Господи, низпосли милость Твою на люди Твоя. И стих псалма: Господи да не яростию Твоею обличиши мене, ниже гневом Твоим накажеши мене. И тропарь: Блгагоутробне, долготерпеливе и прочия стихи псалма 6 припевающе к коемуждо стиху тропарь той-же.
Слава: Яко щедрый Господи, умилосердися на люди Твоя, яко долготерпелив примирися, и помилуй ны.
И ныне: Пресвятая Владычице, всепетая, благословенная, яко боголюбивая, утеши и помилуй нас.
Таже диакон: Господу помолимся (аще же кроме пятидесятницы и недели: Паки и паки преклонше колена) и молитву.
Тебе помолимся и Тебе просим прилежно, Бога и Отца, Господа нашего Иисуса Христа, да милостивым оком призриши на люди Твоя и на наследие Твое, умилосердився на ны и на землю нашу, опустевшую беззаконий ради наших, и плененну бывшую, и рабу супостатом: благоволи паки возвратитися на первую свободу, якоже иногда вси домочадца Иакова онаго, носящаго образ единороднаго Твоего Сына Бога нашего и благоволением и хотением Твоим возвращагося, Ты привел еси к обладанию обетованных Тобою благ. Ибо над ними обычное человеколюбие Твое употребляяй, оставил еси беззакония их. Укротил еси весь гнев Твой, возвратился еси от гнева ярости Твоея. Обрати убо и нас Боже, и о спасительных Твоих заповедех пещися сподоби. Отврати ярость Твою от нас, да не во веки прогневаешися на ны, или простреши гнев Твой от рода в род. Боже Ты обращся, оживи ны, и людие Твои возвеселятся: покажи и на нас милость Твою, и услышим мир и веселие о Тебе. Ей, Господи, услыши нас грешных и непотребных раб Твоих в час сей, еже вселити славу и мир в земли нашей: на Твое бо сподвижение и помощь дерзающе мы недостойнии надеемся, яко милость и истина Твоя предварят нас: кроме бо Тебе иного не вемы и имя Твое именуем, и не отвратишися от нас до конца, но подвигнися и возстани на помощь нас грешных и смиренных, и яко непамятозлобивый и кайся о злобах наших, отврати пленение наше, устави бурю злоключений, ослаби нам прегрешения наши, яко да ослабою злоключений, прославим Тя Отца, Господа нашего Иисуса Христа, с нимже и Святаго Твоего Духа, ныне и присно и во веки веков. Аминь.
Таже ектения малая. Возглас: Яко Твоя держава и Твое есть Царство:
И начинаем вторую статью, в глас 6.
Милостиво, помилуй, помилуй, помилуй нас Господи и стихословити псалом 101 со сладкопением.
Господи услыши молитву мою, и вопль мой к Тебе да приидет.
Милостиве, помилуй, помилуй, помилуй нас Господи и прочая стихи псалма 101 припевающе к коемуждо стиху припев той-же.
Слава: Яко щедрый.
И ныне: Пресвятая Владычица.
Господу помолимся и молитва: Господи Боже Спасителю наш. К Тебе припадаем с сокрушенным сердцем и исповедуем грехи и беззакония наша, ими же раздражихом Твое благоутробие и затворихом щедроты Твоя. Сего ради праведный суд Твой постиже нас, Господи, раздоры и нестроения объяша нас, убийства и кровопролития, вражда и злоба умножишися до зела. Еще и на Церковь Твою Святую воздвижеся лютое гонение, во еже уставы ея разрушати, учение Закона Твоего попирати, благолепие Дому Твоего оскверняти и служителей и благовестников слова Твоего оскорбляти и изгоняти.
Но, Премилосердный Господи, призри с высоты святыя Твоея на слезныя мольбы нищих и скорбных людей Твоих, преложи гнев Твой на милосердие и даждь нам помощь от скорби.
Вемы, яко от лет древних, в годину искушений, страна наша токмо верою Христовой от гибели спасашеся, токмо молитвою и слезами покаяния от козней и сетей вражиих избавляшеся. Сего ради и в умилении сердца вопием к Тебе: охрани и ныне отечество наше от врагов, губящих е, воспламени в сердцах наших любовь к Церкви Твоей Святей и научи нас крепко, даже до смерти стояти за Святую Веру Твою и за славу Имене Своего Святаго, и тако утверди и воспрослави Церковь Твою всесильною крепостию Твоею и от всякаго злаго обстояния избави ю.
О распенших Тя моливый, милосерде Господи и рабом Твоим о вразех молитися повелевый, ненавидящих и обидящих нас прости, не воздаждь им, Господи, по делам их и по лукавству начинания их, не ведят бо, что творят, но к братолюбному и добродетельному настави жительству, да обратятся к Тебе, своему Владыце, и купно с сынами Церкве Твоея прославят Тебе единаго в Троице славимаго Бога во веки веков.
Таже ектения малая. Возглас: Яко благ и человеколюбец и начинаем пети тропарь глас 6:
Яко щедрый и псалом 78 со сладкопением:
Боже приидоша языци в достояние Твое, припевающе к коемуждо стиху тропарь той-же.
Слава: Яко щедрый.
И ныне: Пресвятая Владычица.
Та-же степенна I антифон 4 глас: От юности моея, прокимен глас 7: Господь крепость людем своим даст, Господь благословит люди своя миром.
В храме Его всякий глаголет славу
Всякое дыхание.
Евангелие от Иоанна (гл. 15, 12–14, 18–25, гл. 16, 1–4):
Рече Господь Своим учеником: сия есть заповедь Моя, да любите друг друга, якоже возлюбих вы. Больше сея любве никтоже имать, да кто душу свою положит за други своя. Вы друзи моя есте аще творите, елика Аз заповедах вам. Аще мир вас ненавидит, ведите, яко мене прежде вас возненавиде. Аще от мира бысте были, мир убо свое любил бы: яко-же от мира несте, но Аз избрах вы от мира, сего ради ненавидит вас мир. Поминайте слово еже Аз рех вам: несть раб болий Господина своего. Аще Мене изгнаше и вас изженут, аще слово Мое соблюдоша и ваше соблюдут. Но сия вся творят вам за имя Мое, яко не ведят пославшаго Мя. Аще не бых пришел, и глаголал им, греха не быша имели: ныне же извинения не имут о гресе своем. Ненавидяй Мене и Отца Моего ненавидит. Аще дел не бых сотворил в них, ихже их никтоже сотвори, греха не быша имели: ныне же и видеша и возненавидеша Мене и Отца Моего. Но да сбудется слово написанное в законе их: яко возненавидеша Мя туне. Сия глаголах вам да не соблазнитеся. От сонмищ ижденут вы. Но приидет час, поминайте се, яко Аз рех вам.
По Евангелии ектения сугубая:
Помилуй нас, Боже.
И прошении: Достойная казнем сотворихом, и праведный суд Твой постиже нас, Господи, но пощади люди согрешныя и не погуби до конца: в покаянии к Тебе припадаем и смиренно молим Тя, услыши и помилуй.
Вемы, яко разражихом Твое человеколюибие, всеблагий Владыко, и прогневахом Твою благость: но отврати от нас гнев свой, праведно на ны движимый: отжени от нас раздоры и нестроения, ныне сущия, и кровопролития, и междоусобную брань утоли, в покаянии, сокрушенным сердцем и со слезами молимся тебе, услыши и помилуй.
В скорби и печали нашей, внегда обышедше обыдоша нас врази наши, умиленно вопием к тебе, Господу Богу нашему, да изыдет из истления живот наш, да не до конца погибнем, и да расточатся вси врази наши, яко к Тебе прибегаем и о твоей токмо помощи взываем: услыши, Господи, скорбных и нищих людей твоих и человеколюбно помилуй.
Возглас: Яко милостив.
Отпуст и многолетие сие.
Православной Церкви Российстей, в скорби и утешении сущей, Великому Господину и Отцу нашему Святейшему Тихону, Патриарху Московскому и всея России, Господину нашему, Преосвященнейшему (имя рек), ревнителем, поборником и всем верным чадом Святыя Христовы Церкве, многая лета.
Во блаженном успении вечной покой подаждь Господи усопшим рабом Твоим, за веру и Церковь Православную убиенным, и сотвори им вечную память.
Аще восхощет настоятель, по Евангелии поется канон умилительный рядового гласа, положенный в октоихе в понедельник на утрени, или канон Богородице: Многами содержим напастьми, или иный или святому храма или местночтимому, по каждой песне канона катавасия избави от бед, или спаси от бед или моли Бога о нас. При пении канона может быть совершаемо обхождение храма. По каноне достойно есть или ирмос 9 песни и ектения сугубая.
ГАРФ. Ф. 3431. Оп. 1. Д. 174. Л. 244–248. (То же на Л. 256–260) Машинопись. Копия. Подписи отсутствуют.